الجھا ذہن

یہ بڑی عجیب بات ہے کہ یہ خواتین امور خانہ داری میں بہت زیادہ دلچسپی نہیں لیتیں، اس کی وجہ یہ ہے کہ ان کا رجحان تخلیقی جانب ہوتا ہے۔ امور خانہ داری تو ایک جیسے ہی ہوتے ہیں اور ان میں کوئی خاص تخلیقی گنجائش نہیں ہوتی اس لئے یہ خواتین مصوری، شاعری، افسانہ نگاری اور دیگر فنون کی طرف زیادہ توجہ رکھتی ہیں۔ اس کی وجہ سے ان کے گھریلو معاملات متاثر ہوتے ہیں۔ ان کے شوہر اگر سمجھدار ہیں اور ان میں صبر کا مادہ ہے تو وہ ان کی ایسی باتوں کو در گزر کر دیتے ہیں ورنہ اکثر ان کے گھر میں تلخ کلامی اور جھگڑے ہوتے رہتے ہیں۔ ایسی خواتین کے لئے ضروری ہے کہ اپنے گھریلو معاملات میں اتنی دلچسپی ضرور لیں کہ ان کے بچے اور شوہر مطۂن رہ سکیں۔ انہیں اپنے تخلیقی کاموں کے لئے مخصوص وقت مقرر کرنا چاہئے

یہ خواتین اگر خود پر ذرا سا غور کر لیں تو انہیںیہ بات واضح طور پر سمجھ آ جائے گی کہ ان کے اندر بے شمار صلاحیتیں ہیں۔ اس لئے ماہرین نفسیات کہتے ہیں کہ جوزا عورت کئی عورتوں کی صلاحیتیں رکھتی ہے۔ ان خواتین کو سب سے پہلے تو یہ بات جاننی ہے کہ ان میں بے شمار صلاحیتیں ہیں، اس کے بعد انہیں اپنا تجزیہ کرنا ہے کہ ان میں کون کون سی صلاحیتیں ہیں، یقیناًاسی طرح یہ بات سامنے آئے گی کہ یہ * ہر ماحول میں ڈھل سکتی ہیں۔ * تیز زبان اور طنز کرنے والی ہیں۔ * گھریلو امور سے زیادہ دلچسپی نہیں ہے۔ * بہت زندہ دل ہیں۔ * اچھی میزبان ہیں۔ مندرجہ بالا باتوں کو سامنے رکھ کر آپ فیصلہ کر سکتی ہیں کہ اب آپ کی اپنی زندگی میں کن باتوں کا خیال رکھنا ہے۔ تیز زبان ہونا اور گھر کے امور میں دلچسپی نہ لینا منفی باتیں ہیں لیکن آپ انہیں خامیاں جان کر دور کر سکتی ہیں اور ان کی وجہ سے مثبت پہلوؤں سے فائدہ اٹھا سکتی ہیں مثلاً تیز زبان کسی اہم وقت استعمال کریں اور آرٹ وغیرہ میں نام پیدا کریں۔

جوزا مرد اتنے فضول خرچ نہیں ہوتے جتنی جوزا خواتین ہوتی ہیں۔ شاید قارئین یہ سمجھیں کہ اس کی وجہ یہ ہو گی کہ انہیں باپ، بھائیوں یا شوہر کی طرف سے رقم ملتی ہے اس لئے یہ بے دھڑک خرچ کرتی ہیں ایسی بات نہیں ہے۔ یہ خواتین اگر خود جاب یا کاروبار کرتی ہیں تو تب بھی اپنی رقم کو پانی کی طرح بہاتی ہیں اور یہ عام سی بات ہے کہ اگر سارا پانی بہہ جائے گا تو دریا بھی خشک ہو سکتا ہے، اسی طرح اگر یہ خواتین اپنی اس عادت پر قابو نہ پائیں تو انہیں خاصی مشکلات کا سامنا کرنا پڑتا ہے اس لئے ان کے لئے ضروری ہے کہ: * رقم کو بے دریغ استعمال نہ کریں۔ * ہر چیز خریدنے کی کوشش نہ کریں کیونکہ ان کی خریدی ہوئی اشیاء میں بیشتر ان کے لئے فضول ہوتی ہیں اور یہ شوقیہ طور پر انہیں خریدتی ہیں۔ * یہ سمجھ لیں کہ اگر موجودہ رقم وہ خرچ کر دیتی ہیں تو کیا اس کے بعد ان کے پاس مزید رقم آنے کا امکان ہے؟ * برے وقت کا خیال کریں جس کے آتے دیر نہیں لگتی،اس وقت کے لئے کچھ نہ کچھ پس انداز کر کے رکھیں۔

ان خواتین میں بہت دلکشی ہوتی ہے۔ ان میں سے اکثریت ایسے نین و نقش کی مالک ہوتی ہے جسے دیکھ کر لوگوں کے دل تیزی سے دھڑکنا شروع ہو جاتے ہیں۔اکثرمرد ان سے بات چیت کے خواہاں ہوتے ہیں اور ان کی یہ خواہش اکثر پوری بھی ہو جاتی ہے، اس کی وجہ یہ ہوتی ہے کہ یہ خواتین خاصی شوخ او گفتگو کی دلدادہ ہوتی ہیں، ایسے لوگوں سے بات کرنے کا کوئی مسئلہ نہیں ہوتا جو خود بات کرنا چاہیں، اس لئے اکثر ان خواتین پر یہ الزام آ جاتا ہے کہ یہ بڑی بے باک اور کشادہ ذہن کی ہیں، انہیں اپنی اس خامی کا احساس اس وقت ہوتا ہے جب ان کی شادی کا مسئلہ ہوتا ہے، مرد ایسی خواتین سے بات چیت کر کے اور ان کے ساتھ کچھ وقت گزار کر تو بہت خوش ہوتے ہیں لیکن ایسی خواتین سے شادی کرتے ہوئے اکثر کتراتے ہیں، انہیں خدشہ ہوتا ہے کہ اگر شادی کے بعد بھی ان خواتین کا یہی رویہ رہا تو کیا ہو گا؟ ایسی خواتین کو چاہئے کہ اپنی اس عادت پر قابو پا ئیں۔ اور یورپ وغیرہ میں تو ایسی خواتین میں یہ عادت بہت نقصان دہ نہیں ہوتی لیکن ایشیا کی خواتین کو بہرحال اس عادت کا خمیازہ بھگتنا پڑتا ہے لہٰذا اپنے بہتر حال و مستقبل کے لئے اس عادت پر قابو پائیں۔

یہ خواتین بطور بیوی بہت اچھی ثابت ہوتی ہیں۔ قطع نظر اس کے کہ یہ امور خانہ داری میں بہت زیادہ دلچسپی نہیں لیتی ہیں لیکن بہر حال یہ اپنے گھر میں اس قدر کام ضرور کرتی ہیں کہ کسی کو بہت زیادہ برا نہ لگے، یہ ذہانت سے بھرپور ہوتی ہیں اس لئے اپنے شوہر کو بیشتر قیمتی مشوروں سے نوازتی رہتی ہیں۔ کسی بھی گھر کو قائم رکھنے کے لئے ایک اہم پہلو شوہر اور بیوی کی وفاداری ہے، اس حوالے سے یہ خواتین بہت شاندار کردار رکھتی ہیں۔ یہ اپنے شوہر کی بہت زیادہ وفادار ہوتی ہیں۔ ان کے شوہر کی غیر موجودگی میں بھی انہیں کوئی برا نہیں کہہ سکتا۔ یہ اپنے شوہر کی کوتاہیوں کو درگزر کرتی ہیں اور اس کی خامیوں کا دوسروں کے سامنے ڈھنڈورا نہیں پیٹتی ہیں۔ اگر کبھی ان کے شوہر پر برا وقت آ جائے تو پھر یہ اس کی مدد کے لئے میدان عمل میں کودنے سے بھی دریغ نہیں کرتی۔ یہ اس بات سے بخوبی واقف ہوتی ہیں کہ باہر کے لوگ ان کے گھر کے معاملات کو بگاڑ سکتے ہیں اس لئے اپنے معاملوں میں یہ کسی کو بولنے کی اجازت نہیں دیتیں اور اگر کبھی شوہر سے تلخ کلامی یا جھگڑا ہو جائے تو اسے گھر میں یہ نمٹانے کی کوشش کرتی ہیں۔